#811075
B’fhurasta a áiteamh, mar shampla, gur trí mheán an aistriúcháin go Béarla a chothaigh Hartnett dlúthghaol leis na filí a chuaigh roimhe sa Ghaeilge, ach gur athshealbhú teangúil de chineál eile ar fad atá á thriail aige ina bhunsaothar Gaeilge, áit a séantar tábhacht an traidisiúin: Is fusa saothar Ní Dhomhnaill a shuíomh taobh istigh den mhúnla a chuireann sé os ár gcomhair, ach ní shoiléirítear an gaol a chaithfidh a bheith ann idir cumas teanga an fhile agus a c(h)umas athshaothrú comhfhiosach a dhéanamh trí mheán na Gaeilge ar ghnéithe den traidisiún dúchasach litríochta agus béil.